Úr aðalnámskrá tónlistarskóla:

Mennta- og menningarhlutverk tónlistarskóla er að

13. apríl 2004

Tónleikaröð kennara: Flauta, píanó og tölva

Fimmtu tónleikarnir í Tónleikaröð kennara Tónlistarskóla Kópavogs verða haldnir í Salnum þriðjudaginn 20. apríl 2004 kl. 20.00. Þá koma fram Berglind María Tómasdóttir, flautuleikari, og Arne Jørgen Fæø, píanóleikari.

Efnisskrá:

• Hilmar Þórðarson: Sononymus, fyrir flautu og tölvu (2001)
• Tinna Bjarnadóttir og Haukur Davíð Magnússon: Hulin stund cos 1 (2004)
• Bjargey Ólafsdóttir: Chocolat (2004)
• Hreinn Elíasson: Verk (2004)
• Ragnar Sólberg Rafnsson: Verk (2004)
• Gabriel Fauré: Fantaisie fyrir flautu og píanó op. 79 (1898)
• Atli Ingólfsson: Þrjár andrár (1986)
  1. Áður en hann flýgur
  2. Svangur aftur
  3. Áður en þau falla
• Páll Ragnar Pálsson: Verk (2004)
• Áslaug Einarsdóttir: Gegnumbrot (2004)
• Alex Macneil: Pipeline - Population 84 (2004)
• Sergej Prokofiev: Sónata í D-dúr fyrir flautu og píanó op. 94 (1943)
  1. Moderato
  2. Scherzo - presto
  3. Andante
  4. Allegro con brio

Um flytjendur:

Berglind María Tómasdóttir stundaði nám við Tónlistarskólann í Reykjavík og Tónlistarháskólana í Kaupmannahöfn og París. Meðal helstu kennara hennar voru Bernharður Wilkinson, Hallfríður Ólafsdóttir, Toke Lund Christiansen og Pierre-Yves Artaud. Berglind hefur komið fram á fjölda tónleika í Frakklandi, Danmörku, Svíþjóð, Englandi, Færeyjum, Grænlandi og Íslandi. Hún hefur lagt ríka áherslu á flutning nýrrar tónlistar en 2001 var Berglind valin úr hópi fjölda umsækjenda til þátttöku á námskeiði hjá hinum virta tónlistarhópi Ensemble Intercontemporain. Berglind leikur einleik í flautukonsert Þorkels Sigurbjörnssonar Columbine ásamt Sinfóníuhljómsveit Íslands undir stjórn Vladimirs Ashkenazys á nýútkomnum diski japanska útgáfufyrirtækisins Octavia Records.

Arne Jørgen Fæø er fæddur í Noregi og stundaði tónlistarnám við Tónlistarháskólann í Kaupmannahöfn en meðal kennara hans þar voru José Ribera og Friedrich Gürtler. Arne hefur hlotið fjölda verðlaun og styrkja og á að baki fjölbreyttan tónlistarferil sem meðleikari, kammermúsíkant og einleikari. Hann hefur meðal annars leikið einleik með Sinfóníuhljómsveitum Þrándheims og Stavangurs og er starfandi meðleikari við Tónlistarháskólann í Kaupmannahöfn.

Um verkin og höfundana:

Hilmar Þórðarson samdi Sononymus fyrir flautu og tölvu árið 2001. Hilmar hefur einnig samið verk sem bera sama titil fyrir óbó og tölvu (1998), blokkflautur og tölvu (2000), trompet og tölvu (2003) og er með í smíðum verk fyrir píanó og tölvu og klarínett og tölvu. Sononymus fyrir flautu og tölvu var frumflutt á kennaratónleikum Tónlistarskóla Kópavogs árið 2001 af Martial Nardeau.

Atli Ingólfsson samdi Þrjár andrár í ágúst 1986 og tileinkaði ungum frænkum sínum. Þær voru frumfluttar á tónleikum í Ólafsvík í febrúar 1987. Að sögn Atla má ef til vill finna dálitla hugleiðingu um Chopin í fyrstu andránni.

Gabriel Fauré var tónsmíðakennari og síðar skólastjóri við Tónlistarháskólann í París. Fantaisie op. 79 samdi hann fyrir lokaprófskeppni flautunemanda við skólann árið 1898. Eins og svo mörg önnur verk sem samin voru fyrir umrædda keppni hefur það verið meðal vinsælli verka flautubókmenntanna allar götur síðan.

Sónata Sergejs Prokofievs í D-dúr op. 94 var frumflutt árið 1943 og að tilstuðlan fiðluleikarans Davids Oistrakh umritaði tónskáldið hana fyrir fiðlu og píanó ári síðar. Sónatan er samin í klassískum anda, til að mynda fylgir fyrsti þátturinn sígildu sónötuformi með meginstef í D-dúr og aukastef í A-dúr. Um tildrögin hafði tónskáldið þetta að segja: "Mig hafði lengi langað að semja tónlist fyrir flautu, hljóðfæri sem mér fannst vera vanrækt að ástæðulausu. Ég vildi semja sónötu í fínlegum og flæðandi klassískum stíl."

Um verk eftir nemendur í Tónveri TK

Hugmyndin um samstarf við nemendur í Tónveri Tónlistarskóla Kópavogs kviknaði fyrir um það bil ári síðan. Nemendur í Tónverinu koma úr ýmsum áttum og mér datt í hug að forvitnilegt gæti reynst að kanna hvað færi þar fram. Deildin er sumpart svolítið einangruð frá öðru skólastarfi Tónlistarskóla Kópavogs og hefur jafnvel yfir sér dularfullan blæ, að minnsta kosti innan veggja skólans. Hér fyrir neðan eru punktar um sum verkanna og höfunda þeirra. (B.M.T.)

Tinna Bjarnadóttir og Haukur Davíð Magnússon: Hulin stund cos 1
"Haukur hefur verið meðlimur í hljómsveit sem kallast Fönk Harmony Park í um eitt og hálft ár og ég hef stundað píanóleik við tónlistarskólann frá þrettán ára aldri. Hulin stund cos 1 samanstendur af tveimur ólíkum stefnum, þar sem uppruni okkar í tónlist er ólíkur. Við blöndum saman elektrónískum töktum við klassískar melódíur og út kemur verk sem nánast stendur í stað, tímalaust vegna andstæðna þess gamla við það nýja". (T.B.)

Bjargey Ólafsdóttir: Chocolat
"Ég er starfandi myndlistarmaður og er nýlega byrjuð að semja tónlist. Verkið heitir Chocolat og er fyrir píanó, flautu, Rósu-rödd og tölvu." (B.Ó.)

Áslaug Einarsdóttir: Gegnumbrot
"Gegnumbrot er gert á tónlistarforritinu Reason með aðstoð forritsins Sibelius." (Á.E.)

Páll Ragnar Pálsson: Verk
"Ég hef spilað á rafmagnsgítar í rokkhljómsveit í 11 ár og þetta er frumraun mín í að semja fyrir flautu. Öll hljóð í verkinu eru unnin úr flautuhljóðum." (P.R.P.)

Alex Macneil: Pipeline - Population 84
"Waltz for flute, piano and computer. This is a ridiculously conventional piece of music inspired by the surf-classic "Pipeline" by the Chantays. The Chantays were a teenage group from California whose competent players sadly never matched the success of "Pipeline". That song has been played over and over by party guitarists the world over who are desperate to impress the opposite sex." (A.M.)

Aðgangseyrir

Tónlistarskóli Kópavogs vill eindregið hvetja nemendur til að mæta á kennaratónleikana, enda er aðgangur ókeypis fyrir þá, og ekki spillir að sjá aðstandendur og velunnara skólans með í för.

Almennt miðaverð: 1.500 kr.
Eldri borgarar, öryrkjar og námsmenn: 1.200 kr.
Kennarar Tónlistarskóla Kópavogs: 500 kr. 
Nemendur Tónlistarskóla Kópavogs: Frítt.
Sími í miðasölu er 5 700 400 og er opið virka daga kl. 9.00-16.00 og klst. fyrir tónleika.

[ Til baka á Fréttir 2004 ]