Úr aðalnámskrá tónlistarskóla:

Mennta- og menningarhlutverk tónlistarskóla er að

28. apríl 2006

Tónleikaröð kennara: Frönsk 20. aldar píanótónlist fyrir tvo

Fimmtu og síðustu tónleikar vetrarins í Tónleikaröð kennara Tónlistarskóla Kópavogs verða haldnir í Salnum laugardaginn 6. maí næstkomandi kl. 13:00. Flytjandur eru píanóleikararnir Nína Margrét Grímsdóttir og Sólveig Anna Jónsdóttir. Á efnisskránni eru verk eftir frönsku tónskáldin Claude Debussy, Gabriel Fauré og Francis Poulenc. Öll verkin eru leikin fjórhent á píanó. 

Efnisskrá

• Claude Debussy (1862-1918) 
  Petite Suite
    I. En Bateau
    II. Cortége
    III. Menuet
    IV. Ballet
   
• Gabriel Fauré (1845-1924) 
  Dolly Suite op. 56
    I. Berceuse
    II. Messieu Aoul
    III. Le jardin de Dolly
    IV. Ketty-Valse
    V. Tendresse
    VI. Le pas espagnol
   
• Claude Debussy (1862-1918) 
  Six Épigraphes antiques
    I. Pour invoquer Pan, dieu du vent d´été
    II. Pour un tombeau sans nom
    III. Pour que la nuit soit propice
    IV. Pour la danseuse aux crotales
    V. Pour l´Égyptienne
    VI. Pour remercier la pluie au matin
   
• Francis Poulenc (1899-1963)
  Sónata
    I. Prelude
    II. Rustique
    III. Final

Um verkin

Petite Suite

Debussy samdi Petite Suite 1889 og er hún með fyrstu útgefnu píanóverkum hans. Þar má heyra ýmis stílbrigði sem síðar urðu einkennandi fyrir verk hans svo sem heiltónastigann, mjúkar öldukenndar hreyfingar í innri röddum og draumkenndan hljóm þar sem pedalnotkun og blæbrigðarík tónmyndun ráða ríkjum. Heyra má áhrif balletttónlistar enda tónskáldið unga undir nokkrum áhrifum frá helstu balletttónskáldum samtímans í Frakklandi. Svítan var útsett fyrir hljómsveit 1907 af Henri Büsser en er í sinni upprunalegu mynd eitt af vinsælustu verkum Debussys.

Dolly Suite op. 56

Fauré tileinkaði þessa fallegu og innilegu svítu dóttur vinafólks síns, lítilli stúlku sem var kölluð Dolly. Hann samdi þættina sex sem sjálfstæð verk á árunum 1893-96 og færði Dolly þá jafnóðum sem gjafir af ýmsu tilefni og þeir voru ekki gefnir út sem samstæð svíta fyrr en 1897. Heiti þáttanna tengjast litlu stúlkunni og heimi hennar.

Dolly svítan er heillandi verk í einfaldleika sínum og hefur í hugum margra fundið sér stað við hlið tveggja þekktra barnalagaflokka fyrir einleikspíanó: Kinderszenen eftir Schumann og Children´s Corner eftir Debussy. Hún var útsett fyrir hljómsveit 1912 og flutt sem ballett tónlist í leikhúsi í París ári síðar, en nýtur samt sem áður mestra vinsælda í upprunalegri mynd.

Six Épigraphes antiques

Titilinn má útleggja sem "sex fornar yfirskriftir".

1. Að ákalla Pan, guð sumarvindanna
2. Til nafnlausrar grafar
3. Svo nóttin gefi góð fyrirheit
4. Fyrir dansmeyna með kastaníetturnar
5. Fyrir hina egypsku
6. Til þakkar regninu að morgni

Þessi verk voru samin 1914 og má í þeim heyra hljómrænan og blæbrigðaríkan stíl síðustu ára tónskáldsins. Áhugi hans á fornri miðjarðarhafsmenningu skín í gegn og flæði hljóma og laglína virðist óháð tíma og rúmi.

Verkin eru að hluta byggð á stuttum þáttum, sem Debussy samdi um 1901, fyrir 2 hörpur, flautur og celestu og voru fluttir með leikrænum upplestri ljóða sem byggðust á fornum grískum stefjum.
Debussy valdi hverjum þætti verksins yfirskrift úr ljóðum þessum og lýsir innihaldi þeirra með draumkenndu og allt að því munúðarfullu tónmáli sem hann notar þó svo sparlega að hann endursamdi verkið ári síðar sem einleiksverk.

Sónata

Poulenc var, eins og hin tvö tónskáldin, mjög góður píanisti og samdi mikið af kammermúsik þar sem píanóið skipaði stórt hlutverk. Fjórhentu sónötuna samdi hann árið 1918 aðeins 19 ára.

Í þessu æskuglaða verki kemur gagnsær stíll hans vel fram, snerpa og glettni í bland við ljóðrænar línur, alvara og kátína fylgjast að þannig að stundum virðist útkomuna vanta dýpt og meiningu, en ef betur er að gáð er slíkt fjarri lagi, allt hefur sinn tilgang.

Verkið er stutt og hnitmiðað í þrem köflum: prelúdía, sveitalíf og lokaþáttur, og byggir á einföldum stefjum þar sem tónskáldið leikur sér með taktfastan hryn, einfaldar laglínur, snögg skipti milli hugmynda, ómstríð tónbil í samstígum hreyfingum og litríka hljóma.

Um flytjendur

Nína Margrét Grímsdóttir píanóleikari hefur lokið háskólaprófum í tónlist frá Englandi og Bandaríkjunum. Hún hefur komið fram á Íslandi, Evrópu, Bandaríkjunum, Kanada og Japan sem einleikari, með hljómsveitum og í kammertónlist. Þar má nefna Kammersveit Reykjavíkur, Royal Chamber Orchestra, Blásarakvintett Reykjavíkur og Nomos Duo. Enn fremur má nefna tónlistarflutning í sjónvarpi og útvarpi á Íslandi og erlendis, þátttöku í innlendum og alþjóðlegum tónlistarhátíðum, kennslu á tónlistarnámskeiðum auk birtra greina um tónlist og tónlistarmenntun og fyrirlestra. 

Nína Margrét hefur einnig hljóðritað þrjá geisladiska en þeir eru: Páll Ísólfsson: Complete Original Piano Music - BIS Records (BIS 1139); F. Mendelssohn: Complete Works for Violin and Piano/Nomos Duo - Naxos (8.554725); og Mozart & Mendelssohn: Piano works - SKREF.008. 

Nína Margrét er stofnandi og listrænn stjórnandi KaSa hópsins, Tónlistarhóps Reykjavíkurborgar 2006, og deildarstjóri við Tónlistarskóla Kópavogs.

Sólveig Anna Jónsdóttir stundaði píanónám við Tónlistarskólann á Akureyri, Tónlistarskólann í Reykjavík og University of Houston í Texas. Meðal kennara hennar voru Philip Jenkins, Halldór Haraldsson og Nancy Weems. Sólveig Anna hefur lengst af haft píanókennslu og meðleik með nemendum að aðalstarfi, nú í Tónlistarskóla Kópavogs þar sem hún er einnig deildarstjóri píanódeildar. Hún hefur auk þess starfað með einsöngvurum og kórum, einleikurum og kammerhópum og komið fram á tónleikum hérlendis og erlendis.

Á síðasta ári kom út geisladiskurinn Kveðja þar sem Sólveig Anna og Anna Júlíana Sveinsdóttur, mezzósópran og söngkennari við Tónlistarskóla Kópavogs, flytja íslensk einsöngslög.

Aðgangseyrir

• Almennt miðaverð: 1.500 kr.
• Eldri borgarar, öryrkjar og námsmenn: 1.200 kr.
• Kennarar Tónlistarskóla Kópavogs: 500 kr.
• Nemendur Tónlistarskóla Kópavogs og aðstandendur: Frítt.
• 12 ára og yngri: Frítt

Sími í miðasölu er 5 700 400 og er opið virka daga kl. 9.00-16.00 og klst. fyrir tónleika.

Nína Margrét 
Grímsdóttir

Sólveig Anna 
Jónsdóttir