Úr aðalnámskrá tónlistarskóla:

Mennta- og menningarhlutverk tónlistarskóla er að

23. febrúar 2007

Tónleikaröð kennara: Náttúran í strengjum - Gítar og harpa

Um tónleikaröðina TKTK

Tónleikaröð kennara Tónlistarskóla Kópavogs var hleypt af stokkunum af Kópavogsbæ í samvinnu við kennara skólans og Salinn haustið 2000 og hefur reynst dýrmætt tæki til símenntunar. Hér er kennurum búinn ákjósanlegur vettvangur til að vinna að þeirri frumsköpun, sem er svo mikilvægur þáttur í þjálfun hvers tónlistarmanns og um leið í starfi kennarans. Fimm tónleikar eru áformaðir í TKTK röðinni á starfsárinu, þar sem kennarar Tónlistarskóla Kópavogs kveða sér hljóðs. Á þessum vettvangi gefst nemendum og aðstandendum þeirra kostur á að hlusta á kennara skólans og kynnast þeim betur sem listamönnum, en tónleikarnir eru annars opnir öllum. Tónleikarnir eru klukkustundar langir án hlés.

Efnisskrá

• Áskell Másson
  Kansóna
  
• Áskell Másson
  Berceuse (gítarsóló)
   
• Þorkell Sigurbjörnsson
  Fiori
   
• Alphonse Hasselmans
  Les follets (hörpusóló)
  
• Alan Hovhaness
  "Spirit of Trees", Sónata fyrir hörpu og gítar Op. 374
    I. Andante cantabile-Maestoso rubato-Tempo
    II. Canon:Allegro
    III. Andante maestoso-Fuga:Allegro-Andante grazioso
    IV. Moderato-Allegro con spirito
    V. Andante apassionato

Um verkin

Áskell Másson (1953) samdi Kansónu árið 1984 og var það gefið út í útsetningu J. Fung fyrir tvo gítara. En gítarar hafa ekki fengið að eigna sér þetta fallega lag og hefur það verið leikið í fjölbreytilegri hljóðfæraskipan. Berceuse (vögguvísa) samdi Áskell fyrir gítar árið 1989.

Þorkell Sigurbjörnsson (1938) samdi Fiori árið 1980 fyrir gítarleikarann Wim Hoogewerf og semballeikarann Þóru Johansen. Þorkell aðstoðaði góðfúslega við smávægilegar breytingar svo spila mætti hlutverk sembalsins á hörpu. Fiori merkir blóm. Það þýðir þó ekki að verkið sé eins og blómskrúð: Svo vitnað sé í tónskáldið: "Þetta eru einfaldar tónafléttur".

Alphonse Hasselmans (1845-1912) fæddist í Belgíu og var bæði hörpuleikari og tónskáld. Hann þótti mikill snillingur á hörpuna og hreif Parísarbúa með leik sínum. Þar settist hann að og varð prófessor við Tónlistarháskóla Parísar. Hasselmans vann að því að bæta hörputækni og skrifaði m.a. fræga grein um hörpuleik. Margir nemenda hans urðu mikilsvirtir hörpuleikarar fyrri hluta 20. aldar. Hasselmans lést í París 1912. Les Follets er eitt af þekktustu verkum hans fyrir hörpu þar sem hann nýtir kunnáttu sína á tækni hljóðfærisins til að lýsa villiljósunum eða hrævareldunum.

Alan Hovhaness (1911-2000) sagði að "Spirit of Trees" (samið 1983) væri sónata fyrir hörpu og gítar í barokkformi. Verkið samanstendur af handfylli af stuttum köflum, sem sumir hverjir tengjast beint. Tónlistin er heillandi, fjörug og draumkennd á köflum. Merkja má greinileg áhrif austurlenskrar tónlistar í verkinu enda var Hovhaness af armenskum uppruna.

Um flytjendur

Hannes Guðrúnarson lauk burtfararprófi frá Tónskóla Sigursveins D. Kristinssonar vorið 1993. Hann stundaði framhaldsnám við Tónlistarháskólann í Bergen á árunum 1993-1997 og starfaði jafnframt sem kennari og tónlistarmaður í Vestur-Noregi á þeim árum. Hannes flutti til Akureyrar haustið 1997 og kenndi þar til ársins 2002 ásamt því að vera virkur tónlistarmaður. Hann lék einleikstónleika í Salnum í Kópavogi haustið 2003 og hlaut lofsamlega dóma fyrir. Árið eftir lék hann á kammertónleikum þar ásamt Elísabetu Waage o.fl. Hannes lék tónleika með Pamelu de Senzi þverflautuleikara á Isnord tónlistarhátíðinni í Borgarnesi 2005. Í nóvember 2006 kom Hannes fram á tónleikum í minningu Einars Kristjáns Einarsssonar, gítarleikara.

Elísabet Waage stundaði nám í píanó- og hörpuleik við Tónlistarskólann í Reykjavík og lauk píanókennaraprófi þar 1982. Þá hélt hún til Hollands og stundaði framhaldsnám í hörpuleik við Konunglega Tónlistarháskólann í den Haag. Árið 1987 lauk hún náminu með einleikara-og kennaraprófi.
Að loknu námi bjó og starfaði Elísabet í Hollandi. Hún var þó tíður gestur hér á landi og hélt tónleika í báðum löndum, auk margra annara Evrópulanda. Hún hefur spilað í kammermúsíkhópum s.s. Kammersveit Rvk., Caput-hópnum og verið gestur Cikada í Noregi. Eins hefur hún leikið í ýmsum Sinfóníuhljómsveitum, m.a. Sinfóníuhljómsveit Íslands og Noord-Nederlands Orkest í Hollandi, og komið fram sem einleikari. Elísabet hefur gert upptökur fyrir útvarp og sjónvarp og leikið inn á geisladiska. Sá nýjasti er með Gunnari Kvaran sellóleikara og kom út í september 2004. Elísabet Waage hefur verið hörpukennari við Tónlistarskóla Kópavogs síðan haustið 2002.

Hannes og Elísabet kenna bæði við Tónlistarskóla Kópavogs og léku fyrst saman í tónleikaröð kennara í Salnum haustið 2004. Einnig komu þau fram á Háskólatónleikum í Norræna húsinu í nóvember 2005.

Aðgangseyrir

• Almennt miðaverð: 1.500 kr.
• Eldri borgarar, öryrkjar og námsmenn: 1.200 kr.
• Kennarar Tónlistarskóla Kópavogs: 500 kr.
• Nemendur Tónlistarskóla Kópavogs og aðstandendur: Frítt.
• 12 ára og yngri: Frítt

Sími í miðasölu er 5 700 400 og er opið virka daga kl. 9.00-16.00 og klst. fyrir tónleika.