Úr aðalnámskrá tónlistarskóla:

Mennta- og menningarhlutverk tónlistarskóla er að

28. apríl 2007

Spænsk strengjasveit í heimsókn

Strengjasveit Tónlistarskóla "José Perez Barceló" í Benidorm heimsækir Tónlistarskóla Kópavogs dagana 28. apríl-2. maí. Hljómsveitin, sem er skipuð tónlistarnemum á aldrinum 14-22 ára, heldur tónleika í Salnum mánudaginn 30. apríl kl. 19.30.
Á efniskránni eru verk eftir Pachelbel, Vivaldi, Bach, Holst og Badelt. Fjórir einleikarar koma fram í konsert fyrir fjórar fiðlur op. 3 eftir Vivaldi. Þá kemur einnig fram strengjasveit Tónlistarskóla Kópavogs og leikur með í lokaverkinu.

Tónlistarskóli "José Pérez Barceló" í Benidorm var stofnaður árið 1984 sem héraðstónlistarskóli í Marina Baixa, en fékk viðurkenningu árið 1995 sem opinber tónlistarskóli með réttindanám. Í skólanum kenna 26 kennarar á þau 15 hljóðfæri sem í boði eru. Auk þeirra tónleika sem nemendur koma fram á innan skólans sem hluti af námi sínu, taka þeir þátt í ýmsum menningarviðburðum sem skólinn stendur að. Skólinn hefur á undanförnum árum skipst á nemendaheimsóknum við fjölmarga aðra skóla, bæði innan héraðs, á landsvísu og út fyrir landsteinana. Meðal þeirra má nefna strengjasveit Tónlistarskóla Kópavogs sem heimsótti Benidorm og hélt þar tónleika í maí 2006.

Síðastliðin þrjú ár hefur hljómsveit "José Pérez Barceló" tónlistarskólans spilað á opnunartónleikum alþjóðlega tónlistarnámskeiðsins í Benidorm. Hefur hljómsveitin orðið þess heiðurs aðnjótandi að spila með víðfrægum hljóðfæraleikurum, s.s. flautuleikaranum Benoit Fromanger, saxófónleikaranum Pedro Ituralde og trompetleikaranum Maurice André.

Stjórnandi hljómsveitarinnar, Pedro Salinas Robles, stundaði nám í klarínettuleik og hljómsveitarstjórn við tónlistarháskólana í Valencia og Rotterdam, þaðan sem hann lauk prófum með láði. Hann hefur stjórnað ýmsum hljómsveitum og lúðrasveitum á Spáni og í Hollandi.

Aðgangur að tónleikunum á mánudagskvöld er ókeypis og eru allir tónlistarunnendur hvattir til að mæta.