Tónlistarskóli Kópavogs


	Úr aðalnámskrá tónlistarskóla: Mennta- og menningarhlutverk tónlistarskóla er að
	-	veita öllum, sem þess æskja, færi á að kynnast tónlistarnámi af eigin raun
	-	skapa nemendum tækifæri til tónlistarflutnings, jafnt innan skóla sem utan

FRÉTTIR 2007

Fréttir

16. maí 2007

Burtfarartónleikar Viktors Orra Árnasonar, fiðluleikara

Laugardaginn 19. maí nk. heldur Viktor Orri Árnason, fiðluleikari, burtfarartónleika sína frá Tónlistarskóla Kópavogs sem jafnframt eru hluti framhaldsprófs hans við skólann. Tónleikarnir verða í Salnum, Tónlistarhúsi Kópavogs og hefjast kl. 16.00. Með Viktori Orra á tónleikunum leika Agnieszka Panasiuk, píanóleikari, Eygló Dóra Davíðsdóttir og Páll Palomares, fiðluleikarar, Eydís Ýr Rosenkjær, víóluleikari, Þorgerður Edda Hall, sellóleikari, og Guðrún Óskarsdóttir, semballeikari. Á efnisskrá eru verk eftir Johann Sebastian Bach, Antonio Vivaldi, Ludwig van Beethoven og Max Bruch. Aðgangur að tónleikunum er ókeypis og eru allir velkomnir.

Viktor Orri hóf nám í fiðluleik við Tónlistarskóla Kópavogs átta ára gamall að loknu tveggja ára námi við forskóladeild skólans. Fiðlukennarar hans hafa verið Ásdís Hildur Runólfsdóttir, Martin Frewer og núverandi kennari hans, Unnur Pálsdóttir.

Auk þess að leiða strengjasveit skólans hefur Viktor Orri margsinnis komið fram á tónleikum innan skólans og utan og m.a.komið fram sem einleikari með strengjasveitinni. Undanfarin tvö ár hefur hann verið einn af konsertmeisturum Sinfóníuhljómsveitar tónlistarskólanna og á síðasta ári lék hann í tvígang með Orkester Norden á tónleikaferðum hljómsveitarinnar í Evrópu.

Viktor Orri hefur auk fiðlunámsins lagt stund á píanóleik og tölvutónlist við Tónlistarskóla Kópavogs og um tíma nam hann rafbassaleik við Tónlistarskóla F.Í.H. Þá hefur hann verið félagi í Kór Menntaskólans við Hamrahlíð og nú Hamrahlíðarkórnum. Viktor Orri hefur leikið á rafbassa og fiðlu með nokkrum hljómsveitum, lengst af með hljómsveitinni Búdrýgindi, sem unnið hefur til ýmissa viðurkenninga. Sveitin var sigurvegari Músíktilrauna árið 2002 og hlaut Íslensku tónlistarverðlaunin sama ár.

Viktor Orri lauk stúdentsprófi frá Menntaskólanum við Hamrahlíð í desember síðastliðnum. Hann hyggur á frekara tónlistarnám við Listaháskóla Íslands næsta haust.