Úr aðalnámskrá tónlistarskóla:

Mennta- og menningarhlutverk tónlistarskóla er að

26. október 2008

Tónleikaröð kennara: Bach og Frakkarnir 

Efnisskrá

• Johann Sebastian Bach
  Sónata í E-dúr BWV 1035
  - adagio ma non troppo
  - allegro
  - siciliana
  - allegro assai
  
• Christoph Willibald Gluck
  Orphée Scéne des Champs Elysées
  (Orfeus á Ódáinsvöllum úr óperunni
  Orfeus og Evridís)
  
• Marcel Tournier
  Au matin 
  (Að morgni)
  - konsert-etýða fyrir einleikshörpu
  
• Bernard Andrès
  Narhtex (fordyrið)
  - Lútuleikarinn
  - Flóttinn til Egyptalands
  - Dans nískupúkans
  - Dans djöflanna
  - Dauði nískupúkans
  - Svefn vitringanna
  - Sítarleikarinn
  - Kain og Abel
  - Dans hinna fordæmdu
  - Flótti djöflanna
  
• Gabriel Fauré
  Morceau de concours
  (Keppnisverk)
  
• Maurice Ravel - úts. L. Fleury
  Pièce en forme de Habanera
  (verk í Havana-stíl)
  
• Jacques Ibert
  Entr´acte 
  (millispil)
  

Um verkin

Efnisskráin Bach og Frakkarnir varð þannig til að við Elísabet vorum beðnar um franska efnisskrá fyrir Tónlistarfélag Borgarfjarðar í fyrra. Við höfðum nokkrum sinnum áður leikið franskar efnisskrár en að þessu sinn langaði okkur til smygla inn eftirlætissónötunni í E-dúr eftir J.S. Bach. Og viti menn hún féll eins og engill að Frökkunum og þá rifjaðist það upp fyrir okkur að það var franski flautusnillingurinn Buffardin sem gerði flautuna svo aðlaðandi á tímum Bachs og að Bach átti það að einhverju leyti Frökkum að þakka hve vel hljómandi þýska flautan (traverso) var orðin því hún hafði einnig verið endurbætt við hirð Lúðvíks XIV í Versölum. Og við flautuleikarar síðari tíma erum þá ekki síður þakklát því ekkert stórtónskáld sígildrar tónlistar gerði jafnvel við flautuna og Bach.

Frakkar tóku á 18. öld ástfóstri við Austuríkismanninn Gluck og eigna sér hann gjarnan og hann færði flautunni óviðjafnanlegt millispil í frönsku útgáfunni af Orfeusi og Evridísi.

Verkin eftir Andrès, Fauré, Tournier, Ravel og Ibert eru eru 19. og 20. aldar verk og hafa það að geyma sem ég elska mest við franska menningu: stíl, fágun, hógværð, blæbrigði og elegans en líka furðulega blöndu af lífsnautn og aga. Vonandi getum við komið einhverju af því til skila. (G.B.)

Um flytjendur

Elísabet Waage stundaði nám í píanó- og hörpuleik við Tónlistarskólann í Reykjavík og lauk píanókennaraprófi þar 1982. Þá nam hún hörpuleik við Konunglega Tónlistarháskólann í den Haag í Hollandi. Kennari hennar var hinn virti hörpuleikari og kennari, Edward Witsenburg. Árið 1987 lauk hún náminu með einleikara-og kennaraprófi.

Að loknu námi bjó og starfaði Elísabet í Hollandi. Hún sótti Ísland þó oft heim og hélt tónleika í báðum löndum, auk margra annara Evrópulanda. Hún hefur spilað í kammermúsíkhópum s.s. Kammersveit Reykjavíkur, Caput-hópnum og verið gestur Cikada í Noregi. Eins hefur hún leikið í ýmsum sinfóníuhljómsveitum, m.a. Sinfóníuhljómsveit Íslands og Noord-Nederlands Orkest í Hollandi. Hún hefur komið fram sem einleikari með Kammersveit Rvk., Íslensku hljómsveitinni, Autunno í Hollandi, Avanti í Finnlandi og Århus Sinfonietta í Danmörku. Elísabet hefur gert upptökur fyrir útvarp og sjónvarp og leikið inn á geisladiska. Þeirra á meðal eru diskar með Peter Verduyn Lunel, flautuleikara (Arsis 1994) og með Gunnari Kvaran, sellóleikara (Sonet 2004). Tvívegis hefur Elísabet þegið boð um að spila á Alþjóðlegu hörpuþingi (World Harp Congress), í Kaupmannhöfn árið 1993 og í Amsterdam 2008.

Síðan haustið 2002 hefur Elísabet verið hörpukennari við Tónlistarskóla Kópavogs.

Guðrún Sigríður Birgisdóttir stundaði nám í flautuleik við Tónlistarskólann í Reykjavík m.a. hjá Manuelu Wiesler og nam svo áfram við Musikkhögskolen i Oslo og í Frakklandi. Að loknum prófum frá Ecole Normale de Musique í París (m.a. Diplome d´éxécution í flautuleik og Diplome superieur í kammermúsík) stundaði hún framhaldsnám í París í þrjú ár með styrk frá franska ríkinu. Hún hóf svo störf á Íslandi árið 1982 sem sjálfstæður flautuleikari og sem kennari við Tónlistarskólann í Reykjavík og Tónlistarskóla Kópavogs. Hún er nú deildarstjóri við Tónlistarskóla Kópavogs og hefur útskrifað marga nemendur. 

Guðrún hóf ung störf sem flautuleikari í Hljómsveit Íslensku óperunnar og leikur þar enn. Hún hefur haldið fjölda einleiks- og kammertónleika og hljóðritað fyrir útvarp og sjónvarp og gefið út nokkra geisladiska en einnig leikið á barokkflautu og frumflutt íslensk flautuverk, sem mörg hafa verið samin fyrir hennar tilstuðlan. Guðrún hefur leikið einleik í París, San Fransisco, Prag, Amsterdam, Ljubljana, Oslo, Vínarborg og víðar. Hún hefur verið bæjalistarmaður Kópavogs og fengið starfslaun íslenska ríkisins, síðast árið 2006. Í nóvember er væntanlegur nýr diskur hjá Íslenskri tónverkamiðstöð "Hlið við hlið" með leik Guðrúnar og Martial Nardeau þar sem þau flytja nýlega íslenska flaututónlist sem fyrir þau var samin.

Aðgangseyrir

• Almennt miðaverð: 1.500 kr.
• Eldri borgarar, öryrkjar og námsmenn: 1.200 kr.
• Kennarar Tónlistarskóla Kópavogs: 500 kr.
• Nemendur Tónlistarskóla Kópavogs og aðstandendur: Frítt.
• 12 ára og yngri: Frítt

Sími í miðasölu er 5 700 400 og er opið virka daga kl. 9.00-16.00 og klst. fyrir tónleika.

[ Til baka á Fréttir 2008 ]