Úr aðalnámskrá tónlistarskóla:

Mennta- og menningarhlutverk tónlistarskóla er að

veita öllum, sem þess æskja, færi á að kynnast tónlistarnámi af eigin raun
skapa nemendum tækifæri til tónlistarflutnings, jafnt innan skóla sem utan
FRÉTTIR 2010

 

Fréttir

11. apríl 2010

Tónleikaröð kennara: Nýlegt og grípandi 

Laugardaginn 17. apríl nk. kl. 13.00 verða lokatónleikarnir í tónleikaröð kennara Tónlistarskóla Kópavogs á þessu starfsári. Flytjendur eru Agnieszka M. Panasiuk, píanóleikari, Guðrún Sigríður Birgisdóttir, flautuleikari, Pawel Panasiuk, sellóleikari, og flautunemendur úr Tónlistarskóla Kópavogs.
 

Efnisskrá

  • Þorkell Sigurbjörnsson
    Apaspil fyrir píanó
  • Hilmar Þórðarson
    Selshamurinn fyrir flautu, píanó og selló með þátttöku
    flautunemenda skólans - FRUMFLUTNINGUR
  • George Crumb
    Rödd hvalsins Vox balenae fyrir flautu, píanó og selló

    Í byrjun tónleikanna munu Bryndís Pétursdóttir, Sólveig Magnúsdóttir og Steinunn Vala Pálsdóttir, nemendur í framhaldsnámi í flautuleik, leika tónamínótur eftir Atla Heimi Sveinsson

Um verkin og höfunda

Þorkell Sigurbjönsson: "Apaspil var barnaópera, sem ég skrifaði fyrir krakkana í Barnamúsíkskólanum. Það mun hafa verið 1965. Hún var sýnd í Tjarnarbíói, og aðalstjarnan, apinn, var Júlíana Elín Kjartansdóttir, fiðuleikari. Svo voru fleiri stjörnur, stórar og smáar, og þar á meðal Kristinn Hallsson, hinn ógurlegi dýratemjari!!! Píanólögin voru svo nokkur helstu "númerin" úr þessari óperu."

Íslenskar þjóðsögur fela margar hverjar magnaðar tilfinningar tengdar vandamálum fólks og draumum. Í sögunni um Selshaminn kynnumst við konu sem á sér tvö líf, hið mennska og annað; hennar dýpsta eðli og uppruna sem dýr í sjónum. Augu selsins hafa löngum valdið Íslendingum vangaveltum vegna þess hve þau minna á mannsaugun og því ekki tilviljun að þessi íslenska saga um togstreitu náttúrunnar við siðmenninguna skuli kristallast í þessari mynd um konu og sel. Hilmar Þórðarson samdi tónlist innblásna af sögunni um Selshaminn sérstaklega fyrir þessa tónleika og má heyra öldugang og sávarföll en kannski líka eitthvað fleira um það sem togast á í mannlegu hjarta.

George Crumb samdi Rödd hvalsins árið 1971, en nokkrum árum áður hafði hann heyrt upptöku af söng hnúfubaks og hrifist mjög af. Í þessu verki mælir tónskáldið svo fyrir að hljóðfæraleikararnir skuli vera með svartar grímur og þá mælir höfundir líka með því menn að flytji verkið í djúpbláu ljósi til að undirstrika hið villta haf og aðstoða hlustandann við að gleyma hinu mennska. Verkið er í senn ákaflega fínlegt, fágað og gróft og villt. Tónskáldinu tekst að fá hljóðfæraleikarana til að framkalla ótrúlegustu blæbrigði og hljóð og verður ekki annað sagt en hann hafi skapað ný viðmið í þessu verki. Verkið hefst á einsöng flautunnar og á eftir fylgja tilbrigði kennd við hin ýmsu jarðsögulegu tímabil en í lokin höfumst við í einhvers konar tímaleysi og kyrrð.

Um flytjendur

Píanóleikarinn Agnieszka Malgorzata Panasiuk stundaði nám við tónlistarakademíuna í Gdansk og lauk þaðan meistaraprófi í píanóleik. Í Póllandi starfaði hún með ýmsum kammerhópum og kammersveitum en kom einnig fram sem einleikari. Til dæmis flutti hún píanókonsert Griegs með Olsztyn Philharmonia og konsert í f-moll eftir Chopin með Radomiensis String Quartet. Þá stundaði Agnieszka nám við The Royal Academy of Music í London og fékk þar Krein Scholarship styrk til að nema hjá Michael Dussek og Iain Ledingham. Í Englandi spilaði hún með mörgum einleikurum og kammerhópum, hélt m.a. hádegistónleika í St.-Martin-in-the-Fields, á St.John´s Smith Square og í Senat House Bloombsbury. Á ári 2004 keppti hún svo til úrslita í tónlistarkeppninni Delius Prize. Auk þessa hefur Agnieszka tekið þátt í ýmsum námskeiðum, m.a hjá Jean-Paul Sevilla, Kevin Kenner, Joseph Seiger og Alexander Pablovic. Hún flutti til Íslands haustið 1999 og hefur leikið sóló og með ýmsum kórum, söngvurum og kammerhópnum, bæði á Norður- og Austurlandi og í Reykjavík. Agnieszka starfar í Tónlistarskóla Kópavogs.

Pawel Panasiuk er fæddur í Póllandi og stundaði nám við Chopin- Akademíuna í Varsjá og lauk þaðan meistaraprófi í sellóleik. Hann stundaði framhaldsnám við Trinity College of Music í London og lauk þaðan Postgraduate Diploma. Auk þess hefur hann tekið þátt í ýmsum námskeiðum, m.a. hjá Tobias Kuhne, Wanda Glowacka, Michael Strauss og Victoria Yagling. Pawel hefur leikið með fjölda hljómsveita og í margvíslegum kammerhópum í ýmsum löndum, m.a. í Póllandi, Þýskalandi, Frakklandi, Kúwait, Japan og Bretlandi. Hann er meðlimur Bellarti PianoTrio. Árið 2008 gaf Mittenwald Label út fyrsta geisladisk þeirra með enskri og japanskri kammertónlist. Frá árinu 1999 hefur Pawel búið á Íslandi. Hann er sellóleikari Sinfóníuhljómsveitar Norðurlands og hefur einnig leikið einleik með hljómsveitinni. Pawel hefur spilað marga tónleika m.a. Tíbrá í Salnum á Listahátíðinni á Akureyri og við Mývatn, Listasafni Sigurjóns Ólafssonar og víðar um landíð. Hawel kennir sellóleik m.a. við Tónlistarskóla Kópavogs.

Guðrún Sigríður Birgisdóttir stundaði nám í flautuleik við Tónlistarskólann í Reykjavík m.a. hjá Manuelu Wiesler og nam svo áfram við Musikkhögskolen i Oslo og í Frakklandi. Að loknum prófum frá Ecole Normale de Musique í París (m.a.Diplome d´éxécution í flautuleik og Diplome superieur í kammermúsík) stundaði hún framhaldsnám í París í þrjú ár með styrk frá franska ríkinu. Hún hóf svo störf á Íslandi árið 1982 sem sjálfstæður flautuleikari og kennari við Tónlistarskólann í Reykjavík og Tónlistarskóla Kópavogs. Hún er nú deildarstjóri við Tónlistarskóla Kópavogs og hefur útskrifað marga nemendur. Guðrún hefur haldið fjölda einleiks- og kammertónleika,hljóðritað fyrir útvarp og sjónvarp og gefið út nokkra geisladiska en einnig leikið á barokkflautu og frumflutt íslensk flautuverk, sem hafa verið samin fyrir hennar tilstuðlan. Hún hefur leikið einleik í París, San Fransisco, Prag, Amsterdam, Ljubljana, Oslo, Mexico-city, Atlanta,Vínarborg og víðar. Guðrún hefur verið bæjalistarmaður Kópavogs og fengið starfslaun íslenska ríkisins síðast þrjá mánuði 2009 en það ár gaf hún út ásamt Martial Nardeau hjá Íslenskri tónverkamiðstöð hljómdiskinn Hlið við hlið með íslenskum verkum. Ári síðar gaf hún út diskinn Minning með Herði Áskelssyni við orgelið í Hallgrímskirkju.

Aðgangseyrir

  • Almennt miðaverð: 1.000 kr.
  • Nemendur Tónlistarskóla Kópavogs og aðstandendur: Frítt.
  • 16 ára og yngri: Frítt.

Sími í miðasölu er 5 700 400 og er opið virka daga kl. 14.00-18.00 og klst. fyrir tónleika.

 

[ Til baka á Fréttir 2010 ]

 

Tónlistarskóli Kópavogs | Tónlistarhúsi Kópavogs | Hamraborg 6 | 200 Kópavogur | Sími 578 5700 | tonlistarskoli@tonlistarskoli.is