Úr aðalnámskrá tónlistarskóla:

Mennta- og menningarhlutverk tónlistarskóla er að

21. nóvember 2011

Tónleikaröð kennara: Kristinn H. Árnason 

Tónleikarnir Kristins taka um klukkustund.
 

Efnisskrá

• Alonso Mudarra (1510-1580)
  Romanesca II
  Pavana de Alexandre
  Fantasia
  
• John Dowland (1563-1626)
  Captain Digorie Piper's Galliard
  The Most Sacred Queen Elizabeth, Her Galliard
  
• Johann Sebastian Bach (1685-1750)
  Úr svítu í E-dúr BWV 1006a:
  Loure, Gavotte en Rondeau og Menuett I II
  
• Isaac Albeniz (1860-1909)
  Asturias
  
• Manuel de Falla (1876-1946)
  Danza de Molinero
  Homenaje "Le Tombeau de Debussy"
  Danza del Corregidor
  
• Isaac Albeniz (1860-1909)
  Zambra Granadina
  Sevilla
  
• Enrique Granados (1867-1916)
  Danza Espanola nr. 4 Villanesca

Um verkin og höfunda

Alonso Mudarra (1510-1580) var prestur og tónlistarmaður sem starfaði lengstum við dómkirkjuna í Sevilla á þeim tíma þegar ríkidæmi Spánverja var í sem mestum blóma eftir landafundina miklu í Vesturheimi. Flest verka hans voru samin fyrir Vihuela, hljóðfæri sem líktist nútímagítar í lögun, með sex strengjapörum. Vihuelan hvarf af sjónarsviðinu í lok 16.aldar.

John Dowland (1562-1626) var einn fremsti lútuleikari síns tíma og afkastamikið tónskáld, hann samdi einleiksverk, lútusöngva og kammerverk. Tveir galliard þættir eru hér leiknir og var sá fyrri tileinkaður sjóræningja að nafni Digorie Piper en hann vann sér helst til frægðar að herja á spænsk og dönsk kaupskip með velþóknun ensku krúnunnar, síðari Galliard þátturinn var saminn til heiðurs Elísabetu drottningu.

J.S. Bach (1685-1750) samdi flest verka sinna af veraldlegum toga þegar hann starfaði fyrir hinn tónelska kjörfursta í Köthen. Þeir þrír þættir sem hér eru leiknir eru úr svítu í E-dúr BWV1006a fyrir lútu. Verkið var upphaflega samið fyrir einleiksfiðlu en Bach útsetti verkið síðar fyrir barokklútu.

Isaac Albeniz (1860-1909) var katalónskur píanósnillingur. Spænskar stemningar og staðir birtast ljóslifandi í verkum hans og eru umritanir á verkum hans vinsælar meðal gítarleikara. Asturias er tileinkað samnefndu héraði á Norður-Spáni, Zambra Granadina byggir á dansforminu Zambra Mora sem sígaunar í borginni Granada léku og dönsuðu, dansinn er talinn upprunninn frá Márum, Sevilla byggir á dansinum sevillanas.

Homenaje eftir Manuel de Falla (1876-1946) var samið til minningar um Debussy og er eina verk de Falla sérstaklega samið fyrir gítar, í lok verksins er tilvitnun í eitt af píanóverkum Debussy, Estampes nr. 2 "La soirée dans Grenade". Danza del Molinero og Danza del Corregidor eru útsetningar á þáttum úr ballettinum Þríhyrndi hatturinn. Verkið var frumflutt í London árið 1919 af dansflokki Sergei Diaghilevs "Ballets Russes" og var leikmyndin í þeirri uppsetningu hönnuð af Pablo Picasso.

Spænskur dans nr. 4, Villanesca eftir Enrique Granados (1867-1916) er úr safni tólf dansa fyrir píanó. Dans nr. 4 hefur yfirbragð tignarlegs sveitadans.

Um flytjendann

Kristinn Árnason lauk burtfararprófi frá Tónskóla Sigursveins D. Kristinssonar árið 1983. Hann stundaði framhaldsnám í Englandi, á Spáni þar sem hann dvaldi í tvo vetur og í New York þar sem hann lauk prófi frá Manhattan School of Music árið 1987. Eftir námslok hefur Kristinn haldið fjölda tónleika í Reykjavík og á landsbyggðinni, einn og sem þátttakandi í kammertónlist af ýmsu tagi. Hann hefur haldið einleikstónleika erlendis m.a. í Englandi, Hollandi, Ítalíu, Spáni, Danmörku og Bandaríkjunum. Fimm diskar með gítareinleik hans hafa komið út auk annarra diska. Diskur með verkum eftir Sor og Ponce hlaut íslensku tónlistarverðlaunin árið 1997 í flokki klassískra hljómdiska. Kristinn hlaut verðlaun úr minningarsjóði Kristjáns Eldjárns árið 2007 og hefur hann einnig verið tilnefndur til menningarverðlauna DV.

Aðgangseyrir

• Almennt miðaverð: 1.000 kr.
• Nemendur Tónlistarskóla Kópavogs og aðstandendur: Frítt.
• 16 ára og yngri: Frítt.