Úr aðalnámskrá tónlistarskóla:

Mennta- og menningarhlutverk tónlistarskóla er að

29. febrúar 2012

TKTK-tónleikar: Tvö píanó, 20 fingur

Á síðari tónleikunum þennan dag, sem hefjast kl. 15.00, leika píanóleikararnir Brynhildur Ásgeirsdóttir og Guðríður St. Sigurðardóttir mjög spennandi efnisskrá með verkum fyrir tvö píanó; Sónötu í D-dúr K. 448 eftir W.A. Mozart, fimm smámyndir eftir bandaríska tónskáldið Jeffrey Lependorf og armenska rapsódíu eftir tónskáldin Alexander Arutiunian og Arno Babadjanian. Tónlistin er afar litrík og skemmtileg og áhugavert að heyra víddina sem skapast í leik tveggja píanóa.

Fyrir tónleikana, þ.e. milli kl. 14.00 og 15.00, munu nemendur Tónlistarskóla Kópavogs gleðja tónleika gesti með fjölbreyttum hljóðfæraleik í anddyri Salarins.

Efnisskrá

• Wolfgang Amadeus Mozart (1756-1791)
  Sónata í D-dúr fyrir tvö píanó K. 448
  1. Allegro con spirito
  2. Andante
  3. Molto Allegro
• Jeffrey Lependorf (f. 1962)
  Fimm smámyndir fyrir tvö píanó
  I. Glazed Glitter
  II. A Substance In A Cushion
  III. Nothing Elegant
  IV. Mildred's Umbrella
  V. A Feather
• Alexander Arutiunian (f. 1920) og 
  Arno Babadjanian (1921-1983)
  Armensk rapsódía fyrir tvö píanó (1950)
  Andante - Allegro
  

Um flytjendur

Brynhildur Ásgeirsdóttir byrjaði fimm ára að læra á píanó í einkatímum hjá Jakobínu Axelsdóttur. Hún fór síðan í Tónlistarskólann í Reykjavík þar sem hennar fyrsti kennari var Ursula Ingólfsson Fassbind, en hennar aðalkennari var síðar Jónas Ingimundarson og undir hans leiðsögn lauk hún píanókennara- og burtfararprófi 1986. Í framhaldi fór hún til Hollands og stundaði nám hjá Hermann Uhlorn og Jan M. Huizing fram til ársins 1990. Brynhildur hefur sótt tíma í semballeik hjá Helgu Ingólfsdóttur og Guðrúnu Óskarsdóttur og ljóðameðleik hjá Gerrit Schuil við Söngskóla Sigurðar Demetz. 

Brynhildur er með réttindi til Suzuki-kennslu sem hún hefur unnið undir leiðsögn píanóleikarans Kristins Arnar Kristinssonar. Í dag starfar hún við kennslu í Tónlistarskóla Kópavogs og Allegro Suzuki tónlistarskólanum. Hún hefur starfað með Mótettukór Hallgrímskirkju, Söngsveitinni Fílharmóníu og starfaði um árabil sem meðleikari í Söngskóla Sigurðar Demetz.

Guðríður Steinunn Sigurðardóttir var í píanónámi í einkatímum frá sex ára aldri; í Bretlandi, Hamborg og Reykjavík. Fjórtán ára að aldri innritaðist hún í Tónlistarskólann í Reykjavík þar sem kennarar hennar voru Hermína S. Kristjánsson, Ursula Ingólfsson og Árni Kristjánsson. Guðríður útskrifaðist með einleikarapróf í píanóleik frá Tónlistarskólanum í Reykjavík 1978 en lauk áður píanókennaraprófi frá skólanum. Framhaldsnám stundaði hún við háskólann í Michigan í Ann Arbor og lauk þaðan meistaraprófi í píanóleik árið 1980. Sama ár hlaut hún 1. verðlaun í píanókeppni á vegum Ann Arbor Society of Musical Arts. Guðríður sótti einkatíma í píanóleik hjá Günter Ludwig, prófessor við Tónlistarháskólann í Köln, 1984 til 1985 og hefur tekið þátt í fjölmörgum námskeiðum.

Guðríður hefur verið einleikari með Sinfóníuhljómsveit Íslands, leikið m.a. á vegum Tíbrár, Tónlistarfélagsins í Reykjavík og Kammermúsíkklúbbsins og haldið fjölda tónleika á landsbyggðinni. Erlendis hefur hún leikið í Kanada, Bandaríkjunum, Þýskalandi, Sviss og á öllum Norðurlöndunum.

Auk tónleikahalds kennir Guðríður píanóleik við Tónlistarskóla Kópavogs og Tónlistarskólann í Reykjavík. Guðríður lauk MBA námi í viðskiptafræðum frá Háskóla Íslands 2007.

Aðgangseyrir

• Almennt miðaverð: 1.000 kr.
• Kennarar Tónlistarskóla Kópavogs: 500 kr.
• Nemendur Tónlistarskóla Kópavogs og aðstandendur: Frítt.
• 12 ára og yngri: Frítt