Tónfræðagreinar

Í aðalnámskrá tónlistarskóla eru fleirtöluorðin tónfræði og tónfræðagreinar notuð sem samheiti yfir ýmsar greinar, svo sem tónfræði, hljómfræði, tónheyrn, tónlistarsögu, formfræði og kontrapunkt. Tölvunám tengt tónlist telst einnig til tónfræðanáms, hvort heldur tölvan er notuð til tónsköpunar, nótnaritunar, sem tóngjafi eða upptökutæki.

Tónfræðagreinar eru óaðskiljanlegur hluti náms í tónlistarskóla. Í Tónlistarskóla Kópavogs er miðað við að nemendur stundi tónfræðanám samhliða námi í hljóðfæraleik og einsöng, en einnig er unnt að stunda tónfræðanám eingöngu.

Grunn- og miðnám

Í aðalnámskrá tónlistarskóla er gert ráð fyrir samþættri kennslu tónfræðagreina í grunn- og miðnámi þar sem inntak einstakra greina fléttast saman við margvíslega virkniþætti, svo sem hljóðfæraleik, söng, hreyfingu, lestur, skráningu, hlustun, greiningu og sköpun. Í skólanum er grunnnámi skipt í þrjá bekki og miðnámi í þrjá bekki. Nemendur sækja einn hóptíma á viku í tónfræðum og fer lengd kennslustunda eftir því hvar nemendur eru staddir í náminu. Hjá nemendum í 1. bekk er kennslustundin 40 mínútur, í 2. bekk 45 mínútur, í 3. bekk 60 mínútur og í 4.-6. bekk 70 mínútur. 

Hverju námsári lýkur með lokaprófi, bæði munnlegu og skriflegu, auk þess sem nemendur skila valverkefni frá og með grunnprófi. Nemendur þurfa að ná tiltekinni lágmarkseinkunn á lokaprófinu. Grunnpróf þreyta nemendur í lok 3. bekkjar og miðpróf við lok 6. bekkjar. 

Grunn- og miðpróf í tónfræðagreinum eru þrískipt, þ.e. munnlegt próf, skriflegt próf og valverkefni. Skal öllum hlutum prófsins lokið á sama skólaári. Mat á grunnprófi er á ábyrgð hvers tónlistarskóla en miðpróf er samræmt próf á vegum Prófanefndar tónlistarskóla.

Framhaldsnám

Í framhaldsnámi skiptist tónfræðanám í fernt, þrjár kjarnagreinar og valgrein. Kjarnagreinarnar eru: hljómfræði, tónheyrn og tónlistarsaga en auk þeirra ber öllum nemendum að stunda eina valgrein. Valgreinar eru breytilegar á milli ára en jafnan gefst kostur á framhaldsáföngum í hljómfræði og tónheyrn og námi í raftónlistarsögu. Gerðar eru inntökukröfur í einstakar greinar.

Skólinn gerir kröfu um að nemandi í framhaldsnámi í hljóðfæraleik leggi stund á að a.m.k. eina tónfræðagrein á hverju ári.