Til foreldra

Góð tengsl heimilis og skóla eru mikilvæg forsenda fyrir árangursríku skólastarfi. Tónlistarskólinn leggur áherslu á samstarf foreldra og kennara skólans. 

Í aðalnámskrá tónlistarskóla eru birtar eftirfarandi ábendingar til foreldra og forráðamanna nemenda í tónlistarskólum og einstökum tónlistarskólum ætlað að koma ábendingum áfram til aðstandenda nemenda í viðkomandi skóla.

• Mikilvægt er að nemendur búi við jákvætt viðhorf til tónlistarnámsins, að foreldrar/forráðamenn sýni náminu áhuga og að þeir fylgist með framvindu þess.
• Hljóðfæranám byggist að miklu leyti á daglegri og reglubundinni þjálfun og er því að verulegu leyti heimanám. Án markvissra æfinga verður árangur rýr.
• Nauðsynlegt er að nemendur geti æft sig þar sem þeir verða fyrir sem minnstri truflun og hafa ekki á tilfinningunni að þeir trufli aðra.
• Ungum nemendum þarf að hjálpa við að skipuleggja æfingatímann.
• Árangursríkara er að ungir nemendur æfi sig oftar og skemur í senn en sjaldnar og lengur.
• Tónlistarnám þarf að vera ánægjulegt og ánægjan felst ekki síst í stolti nemandans yfir eigin framförum og aukinni færni.
• Eðlilegt er að áhugi nemenda sé ekki alltaf samur og jafn. Ef nemandi sýnir merki um uppgjöf er mikilvægt að kennari og foreldrar/forráðamenn leiti orsaka og lausna. Stundum er nóg að skipta um viðfangsefni til að áhuginn glæðist á ný.
• Hlustun er afar mikilvægur þáttur í öllu tónlistarnámi. Með því að hlusta á vel flutta tónlist fá nemendur nauðsynlegar fyrirmyndir. Foreldrar/forráðamenn geta lagt sitt af mörkum með því að hvetja nemendur til að hlusta á fjölbreytta tónlist við margs konar aðstæður og með því að fara með þeim á tónleika þegar tækifæri gefast, bæði innan tónlistarskólans og utan.