Tónver Tónlistarskóla 
Kópavogs

Í Tónlistarskóla Kópavogs er boðið upp á nám í tölvutónlist við tónver skólans. Tónverið er elsta starfandi tónver landsins og þar er mjög fullkomin aðstaða til að fást við tónlist og hljóð.

Kennslan skiptist í:

• verklega tíma, þar sem kennd er meðferð tækja og hugbúnaðar til hljóðhönnunar, hljóðritunar og tónsköpunar.
• bóklega tíma, þar sem farið er yfir helstu atriði hljóðfræði og þróun raf- og tölvutónlistar
• tónfræðatíma, þ.e. tónheyrn, hljómfræði og tónlistarsögu auk valgreinar.

Markmið með náminu er að þjálfa nemendur í að nota tölvu sem aðalhljóðfæri og leggja öflugan grunn að námi á háskólastigi og starfi þeirra sem "tölvutónlistarmenn". Námið er á framhaldsnámsstigi samkvæmt aðalnámskrá tónlistarskóla og er námslengd er áætluð þrjú ár. Í einstaka tilvikum kann að vera unnt að ljúka náminu á skemmri tíma en einnig getur lengri námstími verið eðlilegur. Ekki er gert upp á milli tónlistarstefna.

Miðað er við að nemendur, sem hefja nám við tónverið, hafi lokið miðprófi í tónfræðagreinum. Sé þeirri þekkingu ábótavant er boðið upp á sérstaka tíma í tónfræðagreinum og skal miðprófi lokið innan tveggja ára.

Nemendur útskrifast með framhaldspróf í tölvutónlist eftir að hafa fullnægt öllum þeim kröfum sem farið er fram á samkvæmt aðalnámskrá tónlistarskóla.

Í tónverinu eru m.a. eftirtaldir möguleikar og aðstaða:

• Forrit til tónsmíða m.a ProTools, Ableton Live, Logic Pro, Reason, Record, Sibelius, Max o.fl.
• Stafræn hljóðupptaka.
• Hljóðhönnun: Stafræn hljóðmyndun og hljóðvinnsla sem nýtist hvort heldur til að búa til hljóð frá grunni eða meðhöndla áður tilbúin hljóð á margvíslegan hátt.
• Stafræn eftirvinnsla á hljóði, t.d. klipping og hreinsun á gömlum upptökum.
• Tónlistarforritun, þar sem hægt er að láta tölvu stýra ýmsum ferlum við samningu og meðhöndlun tónlistar.
• Aðstaða til nótnaritunar og útprentunar.
• Tæki og forrit sem stjórna tónlist og hljóman hennar á mjög nákvæman, en auðveldan hátt.

Frekari upplýsingar um tónverið má fá á skrifstofu skólans. Einnig er hægt að senda fyrirspurnir beint til kennara tónversins, Haraldar V. Sveinbjörnssonar, Hilmars Þórðarsonar og Ríkharðs H. Friðrikssonar, á netfangið tonver@tonlistarskoli.is