Námsgreinar

Tónlistarskóli Kópavogs er einn af stærri tónlistarskólum landsins og býður upp á heildstætt nám í öllum helstu greinum hljóðfæraleiks, söngs og tónfræða. Námið er skipulagt samkvæmt aðalnámskrá tónlistarskóla. Skólinn leitast ávallt við að mæta eftirspurn eftir síaukinni fjölbreytni í námsframboði. 

Einstakar námsgreinar má sjá í valmynd til hægri.

Í námi í klassískum hljóðfæraleik geta nemendur valið á milli allra helstu hefðbundinna hljóðfæra auk einsöngs.

Í rytmískri deild skólans er boðið upp á nám í söng og á píanó, rafgítar, rafbassa, kontrabassa og trommusett, auk samspils.

Skólinn býður einnig upp á nám í tölvutónlist og tónfræðagreinum (sem aðalgrein).

Við skólann er veitt sérkennsla í tónlist sem ætluð er þeim nemendum sem eiga erfitt með að stunda hefðbundið tónlistarnám. Sjá nánar hér.

Námsframboð skólans tekur mið af því að nemendur geti hafið tónlistarnám á ýmsum aldri. 

4 ára+    Suzuki hljóðfæranám

Suzuki tónlistarnám, sem einnig er kallað móðurmálsaðferðin, er í boði fyrir börn frá 4 ára aldri. Námið byggir á að börnin læra tónlist á sama hátt og þau læra móðurmál sitt. Tæknileg viðfangsefni eru unnin og farið í leiki sem þjálfa ýmsa grunnþætti tónlistar. Foreldrar taka virkan þátt í náminu. Námið er blanda af einkatímum og hóptímum. Sjá nánar hér.

6 ára    Tónaland

Í Tónalandi fyrir 6 ára börn fá þau þjálfun í helstu grunnþáttum tónlistarinnar með samsöng, tónlistarleikjum og fjölbreyttum æfingum. Kennslan fer fram í hóptímum einu sinni í viku.

7 ára    Forskóli

Sjö ára börn geta hafið nám í Forskóla, óháð því hvort þau hafa áður stundað tónlistarnám, t.d. í Tónalandi. Nám í Forskóla er ætlað sem undirbúningur fyrir frekara hljóðfæranám. Fléttað er saman söng, hljóðfæraleik á blokkflautu og skólahljóðfæri, hreyfingu, hlustun, greiningu, nótnalestri og sköpun. Jafnframt er grunnur lagður að nótnalestri. Kennslan fer fram í hóptímum tvisvar í viku.

8 ára    Blokkflautuhópar

Átta ára börnum gefst kostur á námi í litlum hópum þar sem nemendur leika á blokkflautu og skólahljóðfæri. Námið er ætlað til undirbúnings frekara námi í hljóðfæraleik. Hver hópur fær kennslu tvisvar í viku.

8 ára+    Almennt hljóðfæranám

Algengt er að börn byrji almennt hljóðfæranám 8 eða 9 ára. Kennt er á öll helstu hefðbundin hljóðfæri. Hljóðfæranámið fer að jafnaði fram í einkatímum en einnig er boðið upp á nám í hljóðfæraleik í litlum hópum.

10 ára+    Rytmískt hljóðfæranám

Í skólanum er boðið upp á rytmískt tónlistarnám á píanó, rafgítar, rafbassa, kontrabassa og trommusett, auk samspils.

Skipulag hljóðfæranámsins

Samkvæmt aðalnámskrá tónlistarskóla skiptist námið í þrjá megináfanga; grunnnám, miðnám og framhaldsnám og lýkur hverjum áfanga með áfangaprófum, annars vegar í hljóðfæraleik og hins vegar í tónfræðagreinum. 

Námstími innan hvers áfanga er breytilegur og ræðst m.a. af aldri, þroska, ástundun og framförum. Miðað er við að flestir nemendur sem hefja hljóðfæranám 8-9 ára ljúki grunnnámi á um það bil þremur árum. Í mið- og framhaldsnámi eykst umfang námsins og sá tími sem tekur að ljúka áföngunum.

Að jafnaði fer hljóðfæranám fram í einkatímum og fær nemandi í 1/1 námi 60 mínútna kennslu í aðalgrein í viku hverri. Byrjendur eru að jafnaði í 2/3 námi og fá 40 mínútna kennslu í aðalgrein á viku. Einnig er boðið upp á nám á sum hljóðfæri í litlum hópum. 

Sem hluta af námi sínu sækja nemendur tíma í tónfræðagreinum ásamt sinni aðalgrein. Í grunn- og miðnámi er um að ræða samþætt nám í tónfræðum, tónheyrn, hlustun, sköpun og tónlistarsögu. Í framhaldsnáminu taka við aðskildir tímar í hljómfræði, tónheyrn og tónlistarsögu, auk valgreina.

Í náminu er lögð áhersla á samleik af ýmsu tagi, m.a. með kennslu í kammertónlist, og lögð er rækt við að nemendur komi fram á tónleikum innan skólans, sem eru fjölmargir.