Námsgreinar

Fjöldi námsgreina stendur til boða í Tónlistarskóla Kópavogs. Nám allflestra nemenda skólans hefst í forskólanum, sem er samþætt byrjendanám til undirbúnings frekara námi í hljóðfæraleik.

Þegar hefja skal nám í hljóðfæraleik geta nemendur valið á milli allra helstu hefðbundinna strengja- og blásturshljóðfæra auk píanós. Þá er boðið upp á nám í einsöng, tölvutónlist og tónfræðagreinum. Hver nemandi stundar nám í aðalgrein auk tónfræðagreina.

Skipulag hljóðfæranámsins

Samkvæmt aðalnámskrá tónlistarskóla skiptist námið í þrjá megináfanga; grunnnám, miðnám og framhaldsnám og lýkur hverjum áfanga með áfangaprófum, annars vegar í hljóðfæraleik og hins vegar í tónfræðagreinum. Þessi áfangaskipting kemur í stað eldri stigaskiptingar og er nemendum skólans ekki raðað í stig innan áfanganna.

Námstími innan hvers áfanga er breytilegur og ræðst m.a. af aldri, þroska, ástundun og framförum. Miðað er við að flestir nemendur sem hefja hljóðfæranám 8-9 ára ljúki grunnnámi á um það bil þremur árum. Í mið- og framhaldsnámi eykst umfang námsins og sá tími sem tekur að ljúka áföngunum.

Að jafnaði fer hljóðfæranám fram í einkatímum og fær nemandi í 1/1 námi 60 mínútna kennslu í aðalgrein í viku hverri. Byrjendur eru að jafnaði í 2/3 námi og fá 40 mínútna kennslu í aðalgrein á viku. Einnig býður skólinn byrjendum upp á nám í litlum hópum á blokkflautu, fiðlu og gítar. Þá er einnig boðið upp á nám fyrir börn í fiðluleik, píanóleik og sellóleik samkvæmt Suzuki-aðferð.

Sem hluta af námi sínu sækja nemendur tíma í tónfræðagreinum ásamt sinni aðalgrein. Í grunn- og miðnámi er um að ræða samþætt nám í tónfræðum, tónheyrn, hlustun, sköpun og tónlistarsögu. Í framhaldsnáminu taka við aðskildir tímar í hljómfræði, tónheyrn og tónlistarsögu, auk valgreina.

Í náminu er lögð áhersla á samleik af ýmsu tagi, m.a. með kennslu í kammertónlist, og lögð er rækt við að nemendur komi fram á tónleikum innan skólans, sem eru fjölmargir.

Í forskólanum eru nemendur frá sjö ára aldri undirbúnir fyrir frekara nám í hljóðfæraleik.