Suzuki-fiðla
 Suzuki fiðlunám er kennt við japanska fiðlukennarann
Shinichi Suzuki. Þetta er herminám þar sem börnin læra lögin
með því að hlusta á námsefnið heima. Mikið af kennslunni
í byrjun fer fram með því að kennarinn sýnir og lætur
nemendurna herma eftir.
Sérkenni Suzukiaðferðarinnar er að börnin byrja mjög ung
í hljóðfæranámi með aðstoð foreldra. Börnin læra
tónlistina eftir eyranu í byrjun, nótnalestur kemur
síðar.
Námið hefst með foreldrafræðslu, en þar fá foreldrar
innsýn í námið og hugmyndafræði þess og fá tilsögn við
fyrstu skref hljóðfæraleiksins, því þeir þurfa að hjálpa
barninu heima.
Allir nemendur fá einkatíma einu sinni í viku. Lengd
einkatíma er venjulega 30 mínútur, en fer eftir aldri og
einbeitingu og hve langt nemendur eru komnir í náminu. Foreldrar
fylgja börnum sínum í alla tíma.
Hóptímar eru aðra hverja viku. Þar þjálfast nemendur í
að spila saman og hverjir fyrir aðra. Tæknileg viðfangsefni
eru unnin og farið í leiki sem þjálfa ýmsa grunnþætti
tónlistar. Félagslegi þátturinn gegnir veigamiklu hlutverki,
bæði fyrir nemendur og foreldra.
Nótnalestur er þjálfaður um leið og nemandinn hefur það
gott vald á grunntækni hljóðfæraleiksins að einbeiting við
lesturinn trufli ekki. Það má miða við að nótnalestur fari
af stað þegar fyrsta hefti grunnnámsefnis er lokið.
Mikilvægur þáttur námsins er að koma fram á tónleikum.
Það er upphefð og örvandi takmark.
Þegar nemandi hefur lokið námsefni hverrar bókar fyrir sig
fer fram útskrift í formi sérstakra útskriftartónleika.
Nemandinn leikur lög úr námsefninu og fær skriflega umsögn.
|
